Har bir haydovchi oʻz temir otining uzoq va muammosiz xizmat qilishini istaydi. Buning uchun eng asosiy shartlardan biri — motor moyini oʻz vaqtida oʻzgartirishdir. Afsuski, ayrim haydovchilar masofani yoki vaqtni oʻtkazib yuborib, moyni o'z vaqtida almashtirishmaydi. Keling, buning qanday oqibatlarga olib kelishini koʻrib chiqamiz.
1. Dvigatel qismlarining erta eskirishi Moyning asosiy vazifasi — harakatlanuvchi metall detallar orasida yupqa himoya qatlamini hosil qilish va uning ishqalanishini kamaytirish. Eskirgan moy oʻz xususiyatini yoʻqotib, detallarni yemiradi va dvigatel resursini keskin qisqartiradi.
2. Detallarning qizib ketishi (Pererev) Eski moy oʻzidan issiqlikni yaxshi oʻtkaza olmaydi va qizigan qismlarni yetarlicha sovutolmaydi. Oqibatda dvigatel haddan tashqari qiziydi, bu esa uning kapital taʼmirga kelishiga sabab boʻlishi mumkin.
3. Yoqilgʻi sarfining oshishi Dvigatel moyi eskirganda uning qovushqoqligi oʻzgaradi va harakatlanish uchun qarshilik oshadi. Natijada motor ogʻir ishlay boshlaydi va mashinangiz odatdagidan koʻproq benzin yoki metan yeyishni boshlaydi.
Eslatma! Har doim yurgan masofangizni (kilometrni) yoki vaqtni kuzatib boring. Oʻz vaqtida qilingan texnik koʻrik (TO) kelajakda katta xarajatlarning oldini oladi.